Abstract:
Die Wet op Verbruikersbeskerming 68 van 2008 (WVB) verskaf in Deel G aan die
verbruiker die fundamentele verbruikersreg op billike, regverdige en redelike bedinge en
voorwaardes. Artikel 48 wat deel vorm van hierdie fundamentele verbruikersreg verbied
onbillike, onredelike of onregverdige kontraksbedinge. Weens die bewoording van artikel
48(1)(a)(i) ontstaan die vraag of die geabandonneerde leerstuk van laesio enormis
deur die WVB teruggebring word in geval van verkope tussen verskaffers en verbruikers.
Die historiese ontwikkeling van die leerstuk asook die gemeenregtelike posisie word
ondersoek. Die bepalings en bewoording van artikel 48(1) word krities geanaliseer en
bespreek. In soektog na riglyne ter bepaling van billike koopprys word daar ook na
die Wet op Mededinging 89 van 1998 gekyk. Daar word as deel van die gevolgtrekking
aangevoer dat dit onprakties en onredelik sous wees om die leerstuk van laesio enormis
op die koopprys van koopkontrakte met verbruikers toe te pas of af te dwing.
