Abstract:
Tans heers daar onsekerheid oor die billikheid van die gebruik van die uitslae van genetiese
toetsing deur versekeraars. Versekeraars gebruik die uitslae óf om versekerdes in
verskillende risiko-klasse in te deel om premies te bepaal óf om dekking aan versekerdes
te weier. Hierdie artikel benader die aangeleentheid deur te kyk na die betekenis van
genetiese toetsing, die gebruik van die uitslae van sodanige toetse, die verspreiding of
uitsluiting van die risiko deur die gebruik van die uitslae en sluit af deur ’n moontlike reg
om nie te weet nie aan die versekerde te verleen, onderhewig aan die uitwerking van die
Grondwet op ’n moontlike reg. Internasionale standpunte word ook in ag geneem by die
oorweging van die vraag of Suid-Afrika ook ’n reg om nie te weet nie behoort te erken.
