Abstract:
Die gedagte met hierdie vonnisbespreking is om die beslissing in Welgemoed
met die uitspraak van die Hoogste Hof van Appèl in Odgers v De Gersigny 2007
2 SA 305 (HHA) te vergelyk. (Sien ook my bespreking van Odgers 2008 De
Jure 217.) Die regsvraag in beide sake was of onderhoud by egskeiding wat op
ooreenkoms berus of ’n onderhoudsbevel wat ingevolge artikel 7(1) van die Wet
op Egskeiding 70 van 1979 verleen is, by hertroue van die geregtigde outomaties
verval indien die onderhoudsooreenkoms/-bevel nie uitdruklik hiermee handel
nie. In Odgers beslis appèlregter Maya dat hertroue nie die onderhoud(sbevel)
beëindig nie. Met die Hoogste Hof van Appèl se uitspraak is daar regsekerheid
gebring oor ’n regsvraag wat in die verlede tot verskillende uitsprake aanleiding
gegee het. (Sien in hierdie verband oa Van Schalkwyk 2002 De Jure 144 ev.)
Ondanks die feit dat Welgemoed op 6 Maart 2006 beslis is en Odgers op 30
November 2006, verskyn eersgenoemde saak later in die hofverslae. Vervolgens
wend ek my tot die bespreking van die saak en vergelyk dit met die beslissing
van die Hoogste Hof van Appèl.
