Abstract:
Die Maatskappywet 71 van 2008 het groot veranderinge in die Suid-Afrikaanse korporatiewe
landskap teweeggebring. Hierdie veranderinge het nie net te doen met korporatiewe
bestuur nie maar ook met korporatiewe sosiale verantwoordbaarheid. Die rol van maatskappye
in die gemeenskap het verander. Hulle moet nie slegs aandeelhouers se belange
in ag neem nie, maar ook die belange van ander belangegroepe soos werknemers. Werknemers
se stem en deelname in maatskappye is belangrike aspekte wat veral tans onder
die vergrootglas is. Die Maatskappywet verleen aan werknemers spesifieke regte rakende
deelname in maatskappye. Hierdie regte is duidelik vervat in en spruit voort uit verskeie
bepalings in die Wet. Die Maatskappywet bevat ook ander innovasies wat die sosiale- en
etiekkomitee insluit. Die funksies van hierdie komitee sluit nie net aangeleenthede soos
sosiale en ekonomiese ontwikkeling in nie maar ook arbeids- en diensaangeleenthede. Die
vraag is dus of die verlore skakel in die komitee nie die stem en deelname van werknemers
is nie. Hierdie bydrae ondersoek die aspekte wat deur hierdie komitee gemonitor
word en ondersoek die vraag of werkersdeelname op hierdie komitee versterk behoort te
word ten einde / effektiewe stem aan hulle te verleen in aangeleenthede wat hulle ten
nouste raak.