Abstract:
Meeste Afrikastate is klein en het nie die vermoë om effektief aan prosesse van die
Wêreldhandelsorganisasie deel te neem nie. Hierdie onvermoë, saam met ander faktore, is
die hoofrede vir die voortgesette marginalisering van die kontinent in die globale
ekonomie en handel. Ten einde effektief aan genoemde prosesse deel te neem en in die
voordele van die geglobaliseerde wêreld te deel, moet Afrikastate integreer. Regionalisme
of integrasie is nie ’n doel op sigself nie maar is nodig vir die ekonomiese groei van
Afrikastate. Dit skep groter markte vir handel en belegging en is ’n aansporing tot groter
effektiwiteit, produktiwiteit en mededingendheid. In die lig hiervan stel die artikel drie
kernargumente. Die eerste is dat regionalisme voordele bied wat Afrikastate kan ontgin
ten einde marginalisering op globale vlak te oorkom. Die tweede argument is dat, terwyl
die Suider-Afrikaanse Ontwikkelingsgemeenskap (SAOG) poog om besigheidsreg te
harmoniseer, die Organisation for the Harmonisation of Business Law in Africa
(OHADA) (Organisation pour l’Harmonisation en Afrique du Droit des Affaires) as
voorbeeld kan dien aangesien dit reeds die grondslag gelê het vir die harmonisering van
besigheidsreg in Afrika. Die derde argument is dat die SAOG-tribunaal verbeter moet
word ten einde ’n meer regionale regsraamwerk binne die SAOG daar te stel. In hierdie
verband belig die artikel sommige voordele van regionalisme in Afrika, die lesse wat die
SAOG by OHADA kan leer, die voordele van ’n geharmoniseerde besigheidsreg teen die
agtergrond van die OHADA-ondervinding en die moontlike wyses waarop die SAOGtribunaal
verbeter kan word.
