Abstract:
Die ontstaan van die Afrika Unie (AU) word gesien as ’n poging tot die herposisionering
van Afrika vir die uitdagings van die kontemporêre realpolitik en,
in die besonder, as ’n padkaart tot die bereiking van ’n politieke unie. Die institusionele
argitektuur van die AU, gebaseer op die Europese Unie, dui die bedoeling
van die argitekte van die AU aan om die organisasie met supranasionale
eienskappe toe te rus. Tot op hede het geeneen van die instansies supranasionale
magte begin uitoefen nie. Dit is teen hierdie agtergrond dat hierdie artikel
die bespreking van supranasionalisme en die kerneienskappe van die AU binne
die konteks van Afrika-integrasie probeer plaas deur te argumenteer dat die
instansies van die AU nie supranasionale entiteite is nie. Vir die AU om sy volle
potensiaal te bereik is dit noodsaaklik dat alle lidstate opregte politieke wil toon
om ’n graad van soewereiniteit aan sy instansies te verleen.