Die verband tussen uitbranding en veerkragtigheid onder eerste en tweedejaar BCom studente aan die Universiteit van Pretoria

Abstract

Hierdie studie fokus op positief sielkundige konstrukte soos veerkragtigheid as positiewe krag en die sterk invloed daarvan op alle vlakke van uitbranding. Die studie neem die standpunt in dat dit belangrik is om ondersoek in te stel na die invloed van positiewe konstrukte en die invloed daarvan op die lewens van mense. Verder bied die studie meer spesifieke insig rakende die faktore wat studente in staat stel om bo algemene akademiese en persoonlike uitdagings uit te styg en te floreer. Die doel van die studie was om die verband tussen veerkragtigheid en uitbranding te bepaal, en verder om ondersoek in te stel rakende die vraag of daar verskille bestaan met betrekking tot ras, geslag, jaar van studie, beskouing van akademiese prestasie, persepsies rakende werkslading en tevredenheid met prestasie. Data is ingesamel deur elektroniese opnames per e-pos uit te stuur aan voorgraadse studente aan die Universiteit van Pretoria (UP) deur gebruik te maak van die Universiteit se Qualtrics-sisteem. ? Totaal van (n=361) studente het deelgeneem aan die studie. Die studie het gebruik gemaak van bevestigende faktorontleding om die teoretiese strukture van konstrukte te evalueer. Strukturele vergelykingsmodellering (SVM) is gebruik om beide meervoudige regressie ("multiple regression"), en bevestigende faktorontleding te kombineer. Die aard van verhoudinge tussen veranderlikes is met behulp van SVM verduidelik. Die resultate toon dat die passing van beide modelle aanvaarbaar is nadat sekere items verwyder is. Verder toon resultate dat daar nie ? betekenisvolle verband bestaan tussen veerkragtigheid en uitbranding nie en dat slegs die dimensie van vasberadenheid ? statisties betekenisvolle negatiewe verwantskap met uitbranding toon (b4=?0.614, p<0.01 en ?=0.01). Resultate toon betekenisvolle verskille met betrekking tot geslag, beskouing van akademiese prestasie, persepsies rakende werkslading, asook tevredenheid met akademiese prestasie. Met betrekking tot etnisiteit en jaar van studie was daar geen betekenisvolle verskille in veerkragtigheid of uitbranding nie.