Postmodernisme word dikwels beskou as 'n voortsetting van die
Modernisme omdat die rede deur middel van die rede ondergrawe word
- dat dit dus nie werklik 'n breuk met die Rede is nie. Dit is waar dat die
postmodernisme in hierdie opsig nie werklik 'n breuk met die Modernisme
verteenwoordig nie. Die "lag vir die waarheid" in postmodernistiese fiksie
Iê die tekortkominge van die Modernisme bloot. In hierdie tyd wat die
tekortkoming van die natuuroorheersende rede al duideliker word, word
ontologiese vrae, die metafisika (in teenstelling met rasionaliteit) op die
voorgrond geplaas. Casspirs en Campari's bly nie alleen by die "lag vir
die waarheid" nie. Daar word 'n metafisiese hoop, wat hierdie "lag vir
die waarheid" transendeer, gevestig. 'n Gryp van hoop verby die grense
van rasionaliteit. Daar is lig voor in die tonnel.
