’n Analise van die perspektiewe oor die Slag van Cuito Cuanavale in graad 12-Geskiedenishandboeke

Abstract

Die Slag van Cuito Cuanavale tussen 1987 en 1989 was die grootste konvensionele veldslag in Afrika sedert die einde van die Tweede Wêreldoorlog. Die veldslag is egter kontroversieel weens die historiese agtergrond van die Koue Oorlog en die Angolese Burgeroorlog waarin dit afgespeel het. Die breër historiese konteks waarin die Slag van Cuito Cuanavale plaasgevind het, is vandag nog ’n kontroversiële tydperk wat sorg vir komplekse diskoerse binne ons samelewing wat oorgedra word na die klaskamer se programmatiese kurrikulum in die vorm van handboeke. Die doel van hierdie studie is om ’n analise aan te bied van die perspektiewe wat bestaan rondom die Slag van Cuito Cuanavale wat in ons nasionale voorgeskrewe Geskiedenishandboeke vir graad 12 voorkom. Die konseptuele raamwerk vorm die basis van die studie en word geformuleer deur ’n driebeenbenadering: eerstens, die idee van kontroversiële onderwerpe, tweedens, die konsep van herkontekstualisering van kennis wat oorgedra word van die akademie tot die handboek en derdens, die stiltes wat teenwoordig is ná die proses van herkontekstualisering plaasgevind het. Die breër metodologiese benadering wat gebruik is om die data te analiseer, is kritiese diskoersanalise. Kritiese diskoersanalise is ’n kwalitatiewe navorsingsmetode wat die doel het om geskrewe, gesproke en visuele kommunikasie te ondersoek binne die konteks waarin die uittering plaas(ge)vind het. Die studie maak staat op bestaande tekste in die vorm van nasionale voorgeskrewe en goedgekeurde Geskiedenishandboeke wat in Afrikaans uitgegee is. Die basis waarop die data geselekteer is, is gedoen deur die lys van goedgekeurde en voorgeskrewe handboeke na te slaan en die Afrikaanse Geskiedenishandboeke vir graad 12 te kies. Die bevindings van die studie wys dat daar bepaalde diskoerse gevoer word op die voorgrond en agtergrond van elke handboek, wat aanleiding gee tot die stiltes wat in die betrokke handboeke heers. Die fokus van die diskoerse wissel tussen een van dekolonialisasie of die Koue Oorlog in die konteks van die Angolese Burgeroorlog. Die studie gaan ’n bydra maak tot die breë verstaan van Geskiedenishandboeke in die Suid-Afrikaanse konteks en hoe dit groot of ikoniese veldslae hanteer. Daar word ook ’n bydra gemaak tot die beperkte kennis wat bestaan rondom die Grensoorlog-tydperk en die kontroversiële Slag van Cuito Cuanavale.